Webview依存症患者：渣打香港銀行App
UPDATE 2023.11.23: 本篇出咗唔夠一個星期，渣打就推新版App。呢篇係講緊version 6。
返返原文：
今次講講渣兜…呀唔係，係渣打香港個iOS App。
發鈔銀行呢，三間用緊兩間，阿爺嗰間從來冇幫襯過，之後都冇任何興趣去幫襯，所以佢可能好彩？
另外嗰間好好咩，唔係，只係渣兜差。都係嗰句，冇比較冇傷害。
入正題。
渣打香港個App有幾差。
嗱，又打返個底先，渣打香港個App，基本功能係用到有嘅，啲嘢係用到嘅，好底線嗰隻──即係睇到未必係即時嘅結餘，可以用電話／Email／Proxy經轉數快、Bank Code + 戶口號碼經EGC、或者CHATS過錢本地銀行呀；TT去電匯去第二度呢啲銀行功能都係無問題。
即係叫可以用咁。
可以用同好用係兩回事。
第一個槽點──就係浮力波波同個Chatbot。
個名係咪Stacy定乜鬼？
●浮力波波。個chatbot不如唔好叫Stacy，叫George──「阻住」呀！
Chatbot？免了，謝謝
記得大約係18、19年開始，香港啲財金機構膠…高層就開始吹Chatbot。
然後一兩年之後，一班vendor就好開心咁收錢…呀唔係，係一班中層就響Apprisal寫最大嘅貢獻就係數碼化，引入間機構通往元宇宙嘅捷徑。
喂嗰時Facebook都未改名叫Meta，「元宇宙」三隻字仲未~吹出嚟呃水喉~成為下一代互聯網嘅概念藍本…。
講真，呢啲咁嘅假狗Chatbot，有咩用同邊個真係用？
大家有冇用過，筆者多手，基本上啲機構一有呢啲嘢我就去玩。
Chatbot嘅嘢呢，通常玩一下就好，兩下就會爛。
簡單講，市面用到嘅，最最最好就係放啲IVRS（即係互動電話，廣東話按1、查結餘按1之類嗰啲），因為至少有條路畀個客去行…
「好高熬遠」嗰的先死得慘，懶係要有機械學習呀，於是只係係咁易丟啲FAQ入去「學習」，加個唔係咁靚仔嘅search engine…結果就係關鍵字唔中，關聯字唔夠，問乜冇乜。
而香港行內根本對呢啲嘢就冇美國或者大陸嘅所謂Product mindset產品開發思維，好多時仲係停留響──個 Project「完咗」就轉mode做BAU（Business as usual）但係冇新編預算人手不變，再交畀啲唔關事嘅人去「own」。結果就當然係…呵呵，唔會進化，「同新嘅一樣」。
嗱，筆者就唔識人響渣兜睇住個App嘅。但係佢出Stacy時玩過，今日寫呢篇文時，又玩一下，結果就當然係「同新嘅一樣」啦。
簡單拎幾個問題向呢個所謂Chatbot問下──
大家見到呢兩個答案嘛？
問Stacy，Stacy叫我自己navigate十層去查。我自己搵，又係 navigate十層去查。
係咪好有用先？
──阿Stacy姐唔掂呢，其實真係冇事嘅，唔好行出嚟就得，而唔係響個主畫面度揖揖攘攘…
但係渣兜既朋友唔係咁諗…
而係要將個「聯絡Stacy」個浮動波波硬系要放出嚟？仲要響我睇結餘時擋住啲銀碼？
個Chatbot又廢、個CTA浮波又阻住晒…響設定畀我off咗佢啦。
WebView依存症
第二樣要問候嘅，就係渣兜個App，好明顯係有 WebView依存症。
咩係WebView？簡單講就係一個嵌咗落個App度嘅太監瀏覽器。
如果你由「銀行服務」轉去「投資」，WebView。
如果你響「銀行服務」入面想睇下存款利率，WebView。
如果你響「銀行服務」入面想睇下匯價上落，WebView。
如果你有想用任何自助銀行同信用卡服務…WebView… 仲要係「匠人級手打中文字型」，一入去成版變無字天書要等幾畀佢load…
（其實用system font係唔會死人嘅…）
基本上，如果唔係單純咁show結餘，同埋所有「轉賬」功能之外，其實都離唔開WebView嘅魔掌。
公平啲講，識得用，WebView其實係唔錯嘅工具，一個表現方法做一個專屬網頁版就可以iOS同Android都用到，更新都只係搞網站嗰邊就得，又唔駛完全等App版本更新──唔係個個都響屋企、有無限數據（喂係呀，我又make返呢個point喇UO！）。
隔左條河叫呢款專屬WebView嘅網頁叫HTML5頁或者H5。點解咁叫呢，就唔好問喇，當係一個名詞，人用我用就算喇。
另外，個literary十九幾億人用隻App上面裝嗰十九幾萬種咩小程序，其實就係加強版WebView嚟。
但係如果搵個太監返嚟，閹又閹得唔乾淨，就係問題喇！
WebView唔夠「Responsive」
呢度個「Responsive」，係中晒兩個「Responsive」嘅定義──
一、版面上面唔夠「嚮應」，響任何一個大細嘅電話上面行，都係「差啲」。其實都幾難做到，因為點都有個baseline㗎嘛，款款都硬係有少少問題呢點就夠神奇也；
二、「反應」慢。其實係咪真係每一個用WebView嘅功能都要Load咁耐？無論係屋企光纖+AX Wifi定係5G都係咁慢，每次打開都要最少等個loading轉轉至少至少轉兩次（通常多啲）。喂，啲版本唔係咁多喂咋喎，有冇咁慢？
另外，當個App度十個功能有八個都係用WebView，出「H5」，可以「嚮應」手機屏幕時。當人類嘅Browser開渣兜個網上銀行時，就真係嚇親──唔係手機設計嘅純Desktop版都不但止，字體仲係11px、12px大小，用
砌layout。以為開咗Internet Archives返返2003年。
人哋叫呢啲「爺青回」呀。
最頂唔順嘅頂級UX：360全面賞
點解話WebView怕係閹唔乾淨？
因為就可以做到響渣打App度開「360全面賞」呢個WebView嘅頂級UX。
如果用戶打開「360全面賞」時，個渣兜App會Call個全畫面嘅WebView。
呢個WebView就真係極品喇，成個畫面畀你用晒都依然可以出現啲神奇唔夠位show啲form element嘅玩法。
咁大個畫面走用「frame」去界開，然後成隊人由睇場到帶隊到設計到打字嗰個都唔識數Z-index？可以畀啲自家製form element咁走位法？喂上 Codecanyon 買現成code都好似好啲，仲有保養客服，可以「幫」你搞搞z-index，即係in-case唔識數1、2、3，3大過2大過1……
●可以畀個custom嘅form element「攝」咗響另外一個block前面就夠天才，唔識數z-index？
定係咁大間銀行負責（睇住人哋）做App個BAU預算低到連俾39蚊美金一個月嘅BrowserStack訂閱去搵Simulator試都cut到冇埋？個個都係盲commit code就鬆人？
俄羅斯公仔式「T&C」
財金機構要睇「T&C」同篤「同意、接受」之類就故了然要。
亞洲Fintech中心嘅「T&C」就當然絕對會係PDF。 WebView喎，唔通用Web出文字？咩邏輯？
「360全面賞」就好玩咯，成個畫面都係你嘅又依然可以要我響入面開PDF、碌到「底、但係又唔係最最底，而最入面包住嗰底嘅而唔係外面同中間嗰層嘅底」，因為外面係App，360全面賞係WebView有個殼包住T&C個一截、中間T&C嗰截有個掣，但係佢入面又有一截去Show個網頁，呢個網頁再入面又有個釀咗個PDF同checkbox去「同意」。
如果用戶轆到最面，係永遠都見唔到要「同意」 嘅嗰個checkbox。
如果用戶轆到最中間第二底嗰個最底，都係永遠都見唔到要「同意」 嘅嗰個checkbox。
如果用戶轆到最底最四層嗰個最底，依然係永遠都見唔到要「同意」 嘅嗰個checkbox。
用戶轆到中間第三層嗰個最底，先至會見到要「同意」 嘅嗰個checkbox。
要checkbox剔走先可以下一步。
係咪好好用先？係咪好想介紹埋的叔伯兄弟用？
唔好用？
So99y呀，唔好唔記得，渣打個iPhone App呢，入咗「360全面賞」呀，係黑洞，走唔到要kill㗎！
留言
發佈留言